தீர்மானிப்பது யார்?

புறஜாதியைச் சேர்ந்த அவருடைய குடும்பத்தில், விக்ரம் மட்டுமே இயேசுவை ஏற்றுக்கொண்டிருந்தார். உள்ளூர் திருவிழாவில் பங்கேற்கும்படி அவரது பெற்றோர் அவரைக் கேட்டபோது, அதை எவ்வாறு சமாளிப்பது என்று அவர் கவலைப்பட்டார். எனவே, “தேவனே, நான் செய்ய வேண்டியதை போதித்தருளும்" என்று ஜெபித்தார். இரண்டு நாட்களுக்குப் பிறகு, அவரது பெற்றோர் தாங்களாகவே பிரச்சினையைத் தீர்த்தனர், அவர்களுடனான அவரது உறவும் பாதிக்கப்படவில்லை. விக்ரமின் கவலைகள் தீர்க்கப்பட்டன, மேலும் தனது ஜெபத்திற்குப் பதிலளித்த தேவனை ஸ்தோத்திரித்தார்.

ஒரு புதிய ராஜ்யத்தின் புதிய ராஜாவான யெரொபெயாம் கவலைப்பட்டபோது, அவன் அதைத் தேவனிடம் கொண்டு செல்லவில்லை. தேவன் இஸ்ரவேலை இரண்டு ராஜ்யங்களாகப் பிரித்திருந்தார்; யூதா மற்றும் இஸ்ரவேல். மேலும் யெரொபெயாமை இஸ்ரவேலுக்கு ராஜாவாக நியமித்தார் (1 இராஜாக்கள் 11:31-39). ஆனால் ஜனங்கள் தேவனை வணங்க எருசலேமுக்குச் சென்றபோது, அவர்கள் தங்கள் முன்னாள் ராஜாவான ரெகொயொமுடன் மீண்டும் சோ்ந்துகொள்வர் என்று யெரொபெயாம் கவலைப்பட்டான் (வ.26-27). யெரொபெயாம் தனக்கு முன் வழிகாட்டிய தேவனிடம் தனது கவலையைக் கொண்டு செல்வதற்குப் பதிலாக, தனது ஆலோசகர்களிடம் சென்றான் (வ.28). அவன் பொன்னினால் இரண்டு கன்றுக்குட்டிகளை உண்டாக்கி, “இதோ, இவைகள் உங்களை எகிப்துதேசத்திலிருந்து வரப்பண்ணின உங்கள் தேவர்கள்" என்றான். இது தேவனை கோபமூட்டியது மற்றும் இஸ்ரவேலின் ஆவிக்குரிய சீரழிவுக்கு வழிவகுத்தது.

நமது விசாரங்கள் தொடர்பாக யாரிடம் ஆலோசனை கேட்கிறோம் என்பது முக்கியம். யெரொபெயாமைப் போலவே நாம் மனித ஞானத்தை நம்புகையில், நாம் பிரயோஜனமுள்ளவையாக நினைக்கும் விஷயங்களைச் செய்யலாம், ஆனால் உண்மையில் அவை பிரயோஜனமற்றது (எரேமியா 17:9). நமது கிரியைகள் தேவனுக்கு அதிருப்தியை ஏற்படுத்தலாம் மற்றும் நமக்கும் நமது சமுதாயத்திற்கும் தீங்கு விளைவிக்கலாம். எனவே, நம் சுய ஞானத்தைச் சார்ந்திருப்பதற்குப் பதிலாக, விக்ரம் செய்ததைப் போல நம் கவலைகளைத் தேவனிடம் கொண்டு வர வேண்டும் (யாக்கோபு 1:5). ஏனென்றால், ஆதிமுதல் அந்தம் வரை அறிந்த ஆண்டவர், நம் நடைகளை ஸ்திரப்படுத்துவதாக வாக்களிக்கிறார்.

ஒரே பார்வையாளர்

கைல் ஸ்பெல்லர், சாம்பியன்ஷிப் கூடைப்பந்தாட்டப் போட்டிகளின் போது, உற்சாகமாக அறிவிப்பு கொடுக்கும் தனது பிரேத்யேகமான அறிவிப்பு மொழிநடைக்கு மிகவும் பிரபலமானவர். “ஆரம்பிக்கலாம்!” அவர் மைக்கில் இடி முழக்கினார், ஆயிரக்கணக்கான ரசிகர்களும், அந்த செயலைப் பார்க்கும் அல்லது கேட்கும் லட்சக்கணக்கான மக்களும், 2022 ஆம் ஆண்டுக்கான சிறந்த வர்ணனையாளர் விருதுக்கான பரிந்துரையை பெற்ற அவரது குரலுக்கு இசைகின்றனர். “கூட்டத்தினரையும், வீரர்களையும் எவ்வாறு உற்சாகப்படுத்துவது என்பது எனக்குத் தெரியும்,” என்று அவர் கூறுகிறார். இருப்பினும், அவரது குரல் கலைத்திறனின் ஒவ்வொரு வார்த்தையும் தொலைக்காட்சி மற்றும் வானொலி விளம்பரங்களில் இடம்பெற்றது தேவனை மகிமைப்படுத்துவதாகும் என்கிறார். கைல் மேலும், “ஒரே பார்வையாளர்களுக்காக எல்லாவற்றையும் செய்கிறேன்” என்று தனது பணி குறித்துச் சொல்கிறார்.

கிறிஸ்துவின் தெய்வீகத்தன்மை மற்றும் இறையாண்மை குறித்த சந்தேகங்களை தங்களது நடைமுறை வாழ்க்கையிலும் கூட ஊடுருவ அனுமதித்த கொலோசெய சபையினருக்கு இதே போன்ற நெறிமுறைகளை அப்போஸ்தலன் பவுல் வலியுறுத்தினார். அதற்கு உத்தரவாக, பவுல் எழுதினார், “வார்த்தையினாலாவது கிரியையினாலாவது, நீங்கள் எதைச் செய்தாலும், அதையெல்லாம் கர்த்தராகிய இயேசுவின் நாமத்தினாலே செய்து, அவர் முன்னிலையாகப் பிதாவாகிய தேவனை ஸ்தோத்திரியுங்கள்” (கொலோசெயர் 3:17).

பவுல் மேலும் கூறினார், “எதைச் செய்தாலும், அதை மனுஷர்களுக்கென்று செய்யாமல், கர்த்தருக்கென்றே மனப்பூர்வமாய்ச் செய்யுங்கள்” (வச. 24). கைல் ஸ்பெல்லரைப் பொறுத்தவரை, அதில் அவரது சிற்றாலய போதகர் என்ற பணியும் அடங்கும். அதைக் குறித்து, “பூமியில் எனது நோக்கம் இதுவே; மேலும் அறிவிப்பு கலை அதில் ஒரு சிறந்த பகுதியே” என்கிறார். தேவனுக்கான நமது சொந்த வேலை, நமது ஒரே பார்வையாளருக்கு இனிமையாக இருக்கும். 

பூரணமடைந்த ஊறுகாய்

குழந்தைகளாக, அம்மா வீட்டில் ஆண்டுதோறும் ஊறுகாய் தயாரிக்கும் முறையில் எரிச்சலூட்டும் பகுதியே “அந்த ஜாடியைத் தொடாதே!” என்ற என் அம்மாவின் கடுமையான கண்டனங்கள்தான். அதின் வாசனையை நுகர ஒரு நொடிப் பொழுது கூட நான் அனுமதிக்கப்படவில்லை. அப்போதுதான் பொறுமையாக இருக்கக் கற்றுக்கொண்டேன். அவசியப்பட்ட இரண்டு அல்லது மூன்று மாதங்கள் கடந்து, மாங்காய்கள் அல்லது எலுமிச்சைகள் எண்ணெய்யிலும் மசாலாவிலும் ஊறின பிறகு, என் அம்மா எங்களுக்கு ருசிக்க ஒரு சிறிய அளவை கரண்டியில் தருவார். அந்த காரம் மற்றும் புளிப்பு ஆகியவற்றின் அற்புதமான கலவையாக என் சுவையுணர்வுகளை நிரப்ப நான் உணரும் மகிழ்ச்சி இணையற்றது!

தேவவார்த்தையில் திளைப்பது ஆவிக்குரிய முதிர்ச்சியில் வளர்வதற்கான திறவுகோலாகும். மேலும் ஊறுகாய் தயாரிக்கும் செயல்முறையைப் போலவே, சரியான நேரத்திற்கு முன்பே நாம் பிரிக்கப்பட்டால், நாம் ஆயத்தப்படாமல் இருப்போம். ஆவிக்குரிய முதிர்ச்சியடைய நேரம் எடுக்கும். யாக்கோபு தனது நிருபத்தில், இரக்கம், இச்சையடக்கம், பொறுமை, சமத்துவம், உதாரத்துவம் மற்றும் பரிசுத்தம் போன்ற ஆவிக்குரிய முதிர்ச்சி ஏற்படுத்துபவர்களைப் பற்றிப் பேசுகிறார் (வ.19,27). தேவவார்த்தையை நாம் ஆழமாகப் புரிந்துகொள்ளும்போது இந்தப் பண்புகள் நம்மில் வளர நேரம் எடுக்கும். நாம் "பூரணப்பிரமாணத்தை உற்றுப்பார்த்து" (வ.22) நடக்கும்படி யாக்கோபு கூறுகிறார். நிச்சயமாக, நாம் அங்குக் கற்றுக்கொண்டதை மறந்துவிடக் கூடாது; ஆனால் நாம் "நிலைத்திருந்து" அது சொல்வதைச் செய்ய வேண்டும் (வ.25).

நாம் இன்னும் ஆவியில் வளரும்போது, நாம் என்ன செய்ய வேண்டும் என்பதை நாம் அறிந்திருக்கலாம், ஆனால் உண்மையில் அதை நடைமுறைப்படுத்துவதில் போராடுவோம். நாம் எவ்வளவு அதிகமாக வார்த்தையைக் கவனிக்கிறோமோ, அவ்வளவு எளிதாகத் தேவனின் சுபாவத்தை நறுமணமாக வீசும் ஜனங்களாக மாறுவோம். "செய்கையில் பாக்கியவானாயிருப்பான்" (யாக்கோபு 1:25). நம் வாழ்க்கை மற்றும் செயல்களின் மூலம் தேவனுக்கு மகிமையுண்டாக, நாம் தேவவார்த்தையில் மூழ்குவோமாக (மத்தேயு 5:13-16). 

தேவனின் முன்னேற்பாடு

ஜூன் 2023 இல் ஒரு காட்டில் ஒன்று முதல் பதின்மூன்று வயதுள்ள நான்கு உடன்பிறந்தவர்கள் உயிருடன் மீட்கப்பட்டபோது உலகமே வியந்தது. விமானம் விபத்துக்குள்ளாகி, தங்கள் தாயை இழந்த பிறகு, அவர்கள் காட்டில் நாற்பது நாட்கள் உயிர் பிழைத்துள்ளனர். காட்டின் கடுமையான நிலப்பரப்பை நன்கு அறிந்த குழந்தைகள், காட்டு விலங்குகளிடமிருந்து மரத்தடிகளில் ஒளிந்துகொண்டு, ஓடைகள் மற்றும் மழைநீரைப் புட்டிகளில் சேகரித்து, விமான சிதைவிலிருந்து மரவள்ளிக்கிழங்கு மாவு போன்ற உணவைச் சாப்பிட்டனர். எந்த காட்டுப் பழங்கள் மற்றும் விதைகளை உண்பது பாதுகாப்பானது என்பதையும் அவர்கள் அறிந்திருந்தனர்.

தேவன் அவர்களை ஆதரித்தார்.

அவர்களின் நம்பமுடியாத கதை, நாற்பது ஆண்டுகளாக வனாந்தரத்தில் இஸ்ரவேலர்களை தேவன் எவ்வாறு அற்புதமாகத் தாங்கினார் என்பதை எனக்கு நினைவூட்டுகிறது, இது யாத்திராகமம் மற்றும் எண்ணாகவும் புத்தகங்களில் பதிவு செய்யப்பட்டு வேதாகமம் முழுவதும் குறிப்பிடப்பட்டுள்ளது. அவர் தங்கள் தேவன் என்பதை அவர்கள் அறிந்துகொள்ளும்படி அவர்களுடைய ஜீவனைக் காப்பாற்றினார்.

தேவன் கசப்பான நீரூற்று நீரைக் குடிநீராக மாற்றினார், இரண்டு முறை பாறையிலிருந்து தண்ணீரை வழங்கினார், மேலும் பகலில் மேக ஸ்தம்பத்திலும் இரவில் அக்னி ஸ்தம்பத்திலும் தம் ஜனங்களை வழிநடத்தினார். அவர்களுக்கு மன்னாவையும் வழங்கினார். “அப்பொழுது மோசே அவர்களை நோக்கி: இது கர்த்தர் உங்களுக்குப் புசிக்கக்கொடுத்த அப்பம். கர்த்தர் கட்டளையிடுகிறது என்னவென்றால், அவரவர் புசிக்கும் அளவுக்குத் தக்கதாக அதில் எடுத்துச் சேர்க்கக்கடவீர்கள்” (யாத்திராகமம் 16:15-16).

அதே தேவன் நமக்கு “வேண்டிய ஆகாரத்தை இன்று” (மத்தேயு 6:11) வழங்குகிறார் . “கிறிஸ்து இயேசுவுக்குள் மகிமையிலே “(பிலிப்பியர் 4:19) நம்முடைய தேவைகளை அவர் சந்திப்பார் என்று நாம் நம்பலாம். எப்பேர்ப்பட்ட வல்லமையுள்ள தேவனை நாம் சேவிக்கிறோம்!