மருத்துவமனையில் நீண்ட நாள் அது. இளமையில் ஜொலித்த அந்த பத்தொன்பது வயது இளைஞனைப் பாதித்த நோய்க்கு இன்னும் பதில் இல்லை. வீட்டிற்குத் திரும்பிய குடும்பத்தினர் தளர்ந்திருந்தனர். அவர்களுக்கு ஆச்சரியமாக, அழகாக அலங்கரிக்கப்பட்ட ஒரு பெட்டியின் முன்புறத்தில் ஏசாயா 43:2 அச்சிடப்பட்டு, படியில் வைக்கப்பட்டிருந்தது. உள்ளே, நண்பர்கள் கையால் எழுதப்பட்ட பலதரப்பட்ட ஊக்கமளிக்கும் வேதாகம வசனங்கள் இருந்தன. அடுத்த மணிநேரம் வேதவசனங்களாலும், குடும்ப நண்பர்களின் சிந்தனையாக்கச் செயலாலும் உற்சாகம் உண்டானது.
கடினமான நேரங்கள் அல்லது குடும்ப பிரச்சனைகளை எதிர்கொள்பவர்கள், எப்போதும் ஒரு ஆத்மார்த்தமான ஊக்கத்தை உபயோகிக்கலாம். அதுதான் வேத வசனங்கள். ஒரு நீண்ட பகுதியோ அல்லது ஒரே வசனமோ; உங்களை, ஒரு நண்பரை அல்லது குடும்ப உறுப்பினரை ஊக்குவிக்கும். தனிநபருக்காகவோ அல்லது அனைவருக்குமென்றோ பெறக்கூடிய உற்சாக துளிகளால் ஏசாயா 43 நிறைந்துள்ளது. தேர்ந்தெடுக்கப்பட்ட சில சிந்தனைகளை அதிலே கவனியுங்கள்: கர்த்தர் ” உன்னைச் சிருஷ்டித்தவர்”, “உன்னை உருவாக்கினவர்”, “உன்னை மீட்டவர்” மற்றும் “உன்னைப் பேர்சொல்லி அழைத்தவர்” (வ.1). கர்த்தர் “உன்னோடு இருப்பார்” (வ. 2), அவர் “இஸ்ரவேலின் பரிசுத்தர்” மற்றும் அவர் நமது “இரட்சகர்” (வ. 3).
தேவனின் வாக்குகளை நீங்கள் கருத்தில் கொள்ளும்போது, அவை உங்களை ஊக்குவிக்கட்டும். உங்களுக்குத் தேவையானதை அவர் வழங்குகையில், நீங்கள் வேறொருவரை ஊக்குவிக்கலாம். அந்த வசனப் பெட்டியைச் செய்ய அதிகம் செலவாகவில்லை, ஆனால் அதன் தாக்கம் விலையேறப்பெற்றது. ஐந்து ஆண்டுகளுக்குப் பிறகும், அந்த வசன அட்டைகளில் சில இன்னும் அந்த குடும்பத்தால் போற்றப்படுகின்றன.
ஏசாயா 43ல் வேறு என்ன வாக்குத்தத்தங்களை நீங்கள் அடையாளம் காணலாம்? இன்று யாருடன் வாக்குத்தத்த அட்டை, குறுஞ்செய்தி அல்லது மின்னஞ்சலைப் பகிரலாம்?
அன்பு தேவனே, வேதவசனங்கள் முழுவதும் வாக்குத்தத்தங்களால் நிரம்பியிருப்பதற்காகவும், சரியான நேரத்தில் ஒரே வசனம் கூட என்னை உற்சாகப்படுத்துவதற்கும் நான் இன்று உமக்கு நன்றி கூறுகிறேன்.
